Seuleubèeh awai, lôn peuphôn haba tentang Alam dan Budaya, seumoga geutanyoe jeut tapeusahoe haba. Keu Redaksi tuhoe JKMA Aceh nyang ka geutém teurimoeng ngoen geusyi’ar.

peumikiran lôntuan teuntang “Deungoen Tajaga Uteun,Tapeulindông Udép” keu banmandum lapisan masyarakat di Provinsi Nanggroe Aceh Darussalam lôntuan ucap teurimoeng geunaseh.

Donya nyoe nakeu “sat balat kayee batee”, babandum karunia Ilahi nyang jeut tapeuguna digeutanyoe seulaku hamba. Teuntee patôt tasyukuri ateuh rahmat dan nikmat dari banbandumnyan. Rahmat dan nikmat nyan akan gadoeh dari lingkungan udép geutanyoe meunyoe salah urôh, takeusampéng hukôm alam. Meunyoe hana tapadoli, prèeh…..dong beukong….beuncana alam nyang laén akan teuka.

Uteuen nakeuh sumber daya alam, di sampéng kandungan bumo, mineral, tambang, dan kandungan laôt. Banmandum nyan sumber daya alam karuninya Ilahi. Oleh kareuna nyan, musti tajaga deungoen göt, nak jeut geutanyoe banmandum udép sijahtra.

Nyang that jeut keu masalah udép ureueng lawetnyoe nakeuh teuntang beuncana ie raya, lagee ie paseung di Tamiang, Aceh Timur, Abdiya, Aceh Singkil, dan ie raya bandang di Aceh Tenggara. Contoh-contoh musibah nyang kalheuh geurasakan oleh syedara-syedara geutanyoe nakeuh kareuna keurusakan alam. Peunyebab jih di antara nyan, kayee di Glé oleh pihak pengusaha-pengusaha nyang na izin(HPH) geukoh, geuteubang seumbarangan. Banbandum nyan hana izin(ILEGAL). Ateuh na izin(LEGAL) atawa hana, buet-buet nyang lagee nyan hana mampu geutilék (kontrol) oleh pihak nyang berwajib seuhingga jeut keu bencana bagi rakyat biasa. Beuna taingat nyan bandum nakeuh hareuta pinjaman dari aneuk cuco.

Keubijakan

Meubagoe keubijakan untuk geupeupiyôh ilegal logging kaleuh geulakukan lee pihak peumeurintah. Di antara jih geusita kayee, geubeuntuk tim terpadu keu geutinjau lapangan. Namun, hasé jih hana deuh lom. Buet nyan hana leubèh dari “Leupah jak riwang, leupah cok pulang.”

Riwayat bak ureueng-ureueng tuha, meunyoe kaleupah jak geuyue riwang. Maknajih geuyue kaloen ji’ôh u likôt teuntang peradaban Aceh masa keurajeun Sultan Iskandar Muda. Masa nyan rakyat Aceh udép lam keudamaian, aman, lom nyaman. Nanggroe Aceh Darrussalam adé, makmue, lom meuceuhu, meugah ban sigom donya.

Dalam riwayat geupeugah, Aceh cukôp jaya. Geukheun bahwa Aceh nakeuh jameun meuh (zaman emas), teupatjih masa keurajeun Sultan Iskandar Muda. Raja nyang adé, arief, lom bijaksana. Uteun geuyue jaga bak ureueng binèh glé, pante geuyue jaga bak ureueng taguen sira. Lagee hadih maja, bak utôh geuyue ceumuelék, bak ureueng lisék geuyue keumira.

Uteuen geuyue jaga bak ureueng bineeh glé, maknajih nakeuh Sultan that geupeucaya keu masyarakat nyang tinggai di bineeh glé meunjaga uteun, seubab ureueng bineeh glé nyang leubeeh teupeu teuntang uteuen nyang na di glé, koen ureueng kuta.

Meunyoe tatém cok suritauladan Sultan, teuntèe leubeeh göt uteuen adat di Nanggroe Aceh. Oleh kareunanyan, peumeurintah Aceh, urosan pengelolaan sumber daya alam wajib geupeupulang keu masyarakat adat (local). Lam hai nyoe meunjadi urosan leumbaga adat mukim, deungoen peurangkat adat (insitusi) Pang Uteun, Pawang Glé, dan Peutua Sineubook. Meunan syit sumber daya alam laôt atawa kandungan bumoe nyang laen-laen. Peulom jinoe peumeurintah Aceh kana Undang-undang no.11 Thon 2006 nyangka geusahkan lee Presiden, Bapak Susilo Bambang Yudoyono.

Seubagai payông hukôm keu leumbaga adat mukim dalam meungeulola sumber daya alam bak maseng-maseng wilayah nyan, meustilah deungoen na pengakuan, peunghormatan, lom perlindungan dari peumeuritah Nanggroe Aceh Darrussalam secara teusurat (tertera), yakni deungon na jih qanun.

Oleh Yuriun. Koordinator Dewan Adat JKMA Aceh

Dimuat di Buletin Tuhoe Edisi II, Juli 2007