tuhoe 11 mahe toa

Bunyi’ lam basa Aceh bak kajian nyoe nakeuh bunyi nyang na lam kajian basa meungeunai fonologi. Fonologi nyan nakeuh saboh disiplin ileumè basa nyang geukaji meungeunai bunyi basa.

Bunyi lam basa geutanyoe geukheun cit ngon sue atawa suara. Teuma agak janggai bacut meunyo tapeupadan sue lam kajian bunyi basa. Makajih, lam bhah nyoe takheun ngon bunyi basa, kon sue basa.

Bunyi lam basa Aceh saban mantöng lagè bunyi lam basa-basa laén umumjih. Bunyi basa nyan jeut tabagi lam dua bagian, nyakni bunyi vokai ngon bunyi konsonan. Vokai geubagi lom jeut keu vokai tunggai ‘vokal tunggal’ ngon vokai rangkap ‘vokal ganda’. Meunan cit ngon konsonan, na nyang nanjih konsonan tunggai ‘konsonan tunggal’, na teuma konsonan rangkap ‘konsonan ganda’.

Bunyi-bunyi basa nyoe jitubiet dari artikulato (alat ucap manusia). Alat-alat ucap nyan na nyang nanjih labium (bibi), apek (ujông lidah), alveolum (ôn lidah), laminum (gigo), palatum (langèt-langèt kreuh)), dorsum (uram lidah), velum (langèt-langèt lunak), dentum (uram gigo/pangkal gusi), uvula (anuek teukak/aneuk rukueng), akar lidah, ngon parinx/glothis (kakeun). Dari babandum nyoe, na lom saboh alat teuk nyang cukôp berpengaruh, nyakni pita suara.

Contoh bunyi nyang jitubiet dari labium ngon labium (dua bibi) nakeuh [b], [p], [m], [w]. Bunyi [t] lam basa Aceh na nyang geupeuhasé lé apek ngon dentum. Contohjih, nyang töh. Meunyo apek ngon laminum geupeuhasé bunyi [?]. Bunyi nyoe sama deungon bunyi [?] lam basa Arab. Contohjih lam basa Arab, tsumma. Contoh lam basa Aceh: a?èe (asèe) ‘anjing’. Bunyi meuno biasajih lam dialèk Aceh Rayek. Meujanjan, bunyi [?] nyoe lam dialèk Aceh Rayek bak ungkapan a?èe jeut keu retofleks: atèe. Bunyi nyoe geupeutubiet dari apek ngon palatum.

‘Oh lheuh nyan, bunyi nyang geupeutubiet lé labium ngon dentum (lé bibi yup ngon gigo ateuh) nakeuh [f] ngon [v]. Bunyi huruf-huruf nyoe, jeut takeun hana lam basa Aceh, keucuali kata serapan dari basa laén, miseujih fitnah (dari basa Arab).

Meunyo bunyi nyang geupeuhasé lé dorsum ngon palatum nakeuh lagè [c] ngon [j]. Bunyi nyoe geukeun cit ngon sebutan bunyi palatal. Contohjih: caröng ‘pandai/pintar’, jeue ‘jala’. Bak bunyi palatal nyoe, mantong lé ureueng nyang keuliru, saweueb na cit [sy] nyang geupeuhasé lé palatal sehingga na nyang teumuléh geusyik, meusyén. Padahai, lam basa Aceh hana bunyi [sy], kecuali bak haba husy… (sue parôh mie atawa manok). Peujeut meunan? Saweueb [sy] nakeuh konsonan bergetar. Lam basa Aceh, hana konsonan bergetar, keucuali serapan dari basa laén atawa peungarôh dialèk (bah konsonan bergetar nyoe, takaji pajan-pajan mantong).

Teuma meunyo bunyi dorsum ngon uvula, harahjih ‘hurufnya’ nakeuh [k] ngon [g]. Contohjih: kamoe ‘kami’, gop ‘orang’. Bunyi dorsum meureumpok ngon uvula na cit geupeuhasé [x]. Ma, lam basa Aceh hana haba nyang geupeuphôn ngon haruh [x].

Na padum-padum boh teuk bunyi (haruh) nyang geupeuhasé lé perpaduan alat-alat ucap manusia nyang hana lôntuan seubut di sinoe, saweub haba nyang geupeuphôn ngon haruh nyan hana lam basa Aceh, tetapi mungkén na lam basa laén.

Vokai

Seudeurhanajih, vokai geukeun ngon bunyi nyang udép, saweueb jeut tamong lam huruh konsonan peu mantong. Lam basa linguistik, geukeun ngon “bunyi oral”, nyakni “bunyi lepas”. Lagèe vokai lam basa laén umumjih di donya, lam basa Aceh, vokai geubagi cit jeut keu dua bagian: vokai tunggai ngon vokai rangkap.

Bèda ngon basa Indonesia, vokai tunggai lam basa Aceh na 17 boh: 10 vokai tunggai nyang jitubiet lheuh dari rongga dada meulalui babah; 7 vokai nyang jitubiet dari idông. Vokai nyang jitubiet dari babah nyoekeuh nyang geukeun ngon bunyi oral. Meunyo vokai nyang jitubiet dari idông geukeun ngon bunyi sengau atawa bunyi nasal atawa geukheun cit bunyi c’oe.

Vokai tunggai lam basa Aceh nakeuh [a], [i], [e], [è], [é], [eu], [o], [ô], [ö], ngon [u]. Maséng-maséng vokai nyan jeut tabôh lam contoh lagèe jimiyup nyoe.

tuhoe 11 mahe tabel 1‘Ohleuh nyan, tujôh boh vokai c’oe lam basa Aceh nakeuh [‘a], [‘i], [‘è], [‘eu], [‘o], [‘ö], ngon [‘u]. Contoh lam narit vokal-vokal nyoe nakeuh:

tuhoe 11 mahe tabel 2

Vokai c’oe nyan, bak watèe takeun jitubiet sue c’oe dari lam idông. Nyankeuh jeut, geubôh tanda koma saboh di ateuh [‘]. Tanda nyan geukeun ngon tanda apostrof. Vokai-vokai c’oe nyoe hana lam basa Indonesia, kecuali haba nyang diterjemahkan dari basa laén, miseue: jum’at, do’a, nyang geucok dari basa Arab. Ejaan Indonesia nyang ka geupeuseusuai lam Ejaan Yang Disempurnakan hana lé geupakèk tanda apostrof, bahpih keu bunyi c’o. Teuma meunyo lam basa Aceh, tanda apostrof mantong geungui. Bunyi-bunyijih pih rap saban ngon padum-padum boh harah lam basa Arab.

Contohjih: ‘ab ‘suap’, s’ah ‘bisik’ rap saban ngon bunyi ain [?] basa Arab lam narit ‘alamun ‘donya/dunia’. Meunan cit ngon vokal [‘i], rap saban ngon [?] lam basa Arab bak narit ‘isyaun ‘seupôt/sore’.

Lé Herman RN —Redaktur Pelaksana tuhoe—


Dimuat di Buletin Tuhoe Edisi XI, Desember 2009