Suku Aneuk Jamee nakeuh saboh suku di Nanggroe Aceh Darussalam. Aneuk Jamee nyan nyang le tinggai di Kabupaten Aceh Selatan ngon Kabupaten Aceh Barat Daya, nacit bacut tinggai di Kabupat­en Aceh Barat ngon Kabupaten Nagan Raya.

Lam Kabupaten Aceh Selatan na limong boh kecamatan pen­duduk jih suku Aneuk Jamee. Kecamatan Tapaktuan 90%, Kecamatan Samadua 85%, Kecamatan Labuhanhaji Timur 99%, Kecamatan Labuhanhaji Tengah 95%, Kecamatan Labu­hanhaji Barat 70%, seulaen nyan na lom di Daerah Kluet ngon Kecamatan Bakongan, yakni di Seuleukat.

Meunyo di Kabupaten Aceh Barat Daya, Aneuk Jamee di Ke­camatan Susoh 90% di Kecama­tan Manggeng 40%. Awak nyan banmandum mantong geu­ seutot adat ngon tradisi yang kaleuh na seujak pon bak indatu gobnyan, yang meuasai dari tanoh Minangkabau Sumatera Barat. Ureueng Minangkabau nyan jak u Aceh nyoe geuseu­tot pejabat Kerajaan Aceh yoh masa nyan tinggai di Minang­kabau. Geujak keuno jak mita buet meutani. Seujak masa nyan keuh teuka sabe awak Aneuk Jamee u Aceh. Bak masa nyan, awak Aneuk Jamee ka jeut keu saboh suku dalam Nanggroe Aceh, nyang ka geupeukong ni­bak masa Sultan Iskandar Muda jeut keu Raja/ Sultan Aceh.

Seubeuna jih ureueng Aneuk Jamee jeut diakui seubagoe saboh suku di Aceh nyoe na­keuh awak nyan ka ditinggai seubagian adat tradisi gob nyan, miseue jih hana lé geun­gui marga, hana lé geuseutot sistem pemerintahan awak Minang. Bandum nyan geungui peupatah Minang yang geu­peugah:

Di mano bumi dipijak, di situ langik dijunjuang
Di mano tambilang dihantak, di situ tanaman tumbuah
Di mano rantiang dipijak, di situ bunyi badarak

Seubab lhee boh kalimat nyan keuh, awak Aneuk Jamee bagah “Sahoe langkah sabe linggang, sapeue keun saboh hate” ngon awak Aceh asli, peu lom awak nyan agama jih sabe, yakni Islam.

Lam suku Aneuk Jamee seu­beuna jih rab saban ngon suku Aceh dalam acara meukawen. Bah meunan, pathot tapeugah bacut lam tulesan nyoe meu­bagoe corak meunikah atawa meukawen lam suku Aneuk Jamee.

  1. Nikah Lari; nakeuh sidroe aneuk dara ngon aneuk bu­jang keumeung meukawen hana geurestu bandua pihak ureueng chik jih. Awak nyan dua geuplueng, nikah bak wali hakim.
  2. Nikah Gantuang; nakeuh aneuk dara ngon aneuk bujang leuh meutunangan, seubab keumeujak trep tugas, miseu jih jak sikula. Maka bandua ureueng chik jih geupeugatiep dilee, teu­makot linto nyan tuwoe bak tunangan di gampông.
  3. Nikah Karipuak; nakeuh sidroe aneuk bujang ngon aneuk dara geupeugatiep le ureueng chik ban dua blah pihak geupeusak, geupeu­crok, ngon hana geureun­cana, bah meunan. Bandua blah wareh sabe-sabe geure­stu bak gatiep nyan. Maksud ureueng chik ban dua geu­peucrok nyan nakeuh aneuk agam bek dimita judo bak dara laen. Umum jih meu­gatiep lagee nyan na hubun­gan taloe wareh bandua.
  4. Nikah Mamanjek; meugatiep ngon cara geupeucrok droe. Seulawet nyoe aneuk agam (linto) hantom na meu­gah na maksud keumeung meugatiep ngon aneuk dara nyan. Ngon cara geupeusak droe aneuk agam nyan jak u reumoh aneuk dara lake meugatiep. ‘Oh ka seudia meuh ngon peng yang le, padum mantong geula­kee jiname ngon peng, ek geupeuasoe le agam nyan. Sigohlom geupeugatiep le ureueng chik dara baro nyan, gobnyan han ditem weh di rumoh. Agam nyan jak u rumoh inong ngon dikawai limong droe ureueng nyang kaha ngon teuga.
  5. Nikah Tapakso; nakeuh meugatiep ngon geupaksa. Seubabjih aneuk agam ngon aneuk dara ka teudrop basah geupubuet maksiet atawa geupubuet zina. Meunan cit diteume le masyarakat dua-duaan bak teumpat teusom.
  6. Nikah Elok-Elok; nakeuh ureueng meugatiep/ meu­kawen ngon cara get, yakni pakriban ureueng meukawen nyang kayem geupeuget seucara normal. Ureueng meukawen elok-elok bandum syarat nyang na meunurot agama, adat, ngon tradisi. Bandum geu­peuna, miseujih seulangke, meulakee (meminang), meuduek wali, meuduek ramee, meugatiep, kanduri (meukeureuja) meukawen. Meunyo bak Suku Aneuk Jamee na adat kusus nyang hana lam adat Aceh. Aturan nyan nakeuh meunyo lam adat aceh nyang meukuasa lam keluarga nakeuh wali, lam keluarga Aneuk Jamee nyang meukuasa lam meuke­ureuja nakeuh ninik mamak, yakni aduen atawa ado dari nang (mak) linto baro/ dara baro, wali cuma dipeureulee seubago jok wali mantong. Ninik mamak lam suku Aneuk Jamee yang tanggong jaweub banbandum nyang geupeureulee lam acara peu­kawen aneuk nyan.

Oleh: Muhammad Umar (EMTAS). Penulis buku “Peradaban Aceh (Tamadun)”.


Dimuat di Buletin Tuhoe Edisi IV, Desember 2007