separator

DOA DIKAMOE

Ya Allah Neubri ban pinta kamoe
Ureung nanggroe nyoe udep seujahtra
Bek na le karu di dalam nanggroe
Udep kamoe nyoe beumeuseunia

Damee di babah beutroh lam hate
Beubek meukieh le meuputie-puta
Beuji`oh riya di dalam hate
Beu`ek meusampe ban rakyat pinta

Sejahtra udep ya Allah neubri
Mita raseuki bek lam syok sangka
Bek lam teumakot sabe ya Rabbi
Ya Allah neubri beu`ek seumpurna

Ya Allah neubri peumimpin kamoe
Beu`ek meusaho deungon ulama
Beusapue pakat peutimang nanggroe
Riya teukabo neubri bek le na

Hajat dum rakyat beu`ek meusampoe
Udep lam nanggroe aman seujahtra
Makmu beusare timu ngon barat
Bek na meubida duson ngon banda

Tepat hari MoU di Helsinki, 17-08-2005

PEULARHA ALAM

Wahe dum kawom dalam nanggroe nyoe
Wajeb geutanyoe bumoe tajaga
Bak kayee lam gle peutheun ie ujeuen
Bek jikoh bandum nyan buet hapeha (HPH)

Meuthan bak kayee dalam gle Tuhan
Sayang e rakan tanyoe binasa
Ie raya kayem oh musem ujeuen
Adoe ngon aduen geutanyoe rasa

Meunan cit cicem rimueng ngon cagee
Meuthan bak kayee sayang lagoina
Bandum geutanyoe peuneujeut Tuhan
Peureulee aman udep lam donya

Alam lingkungan lam bumoe Tuhan
Sayang that rakan meuthan ta jaga
Meunyo ka reuloh lingkungan alam
Geutanyoe mumang udep lam donya

Geutanyoe bandum gampong ngon peukan
Peudong bangunan atoran beuna
Bek tadhoe parek tapeudong rumoh
Geutanyoe mehmoh ‘oh ujeun raya

Peudong bangunan beuna atoran
Beu ek seusuai ngon alam lingka
Bek le ateuh krueng tapeudong rumoh
Geutanyoe mehmoh teuka ie raya

Bek tadhoe laot peudong bangunan
Sayang e rakan oh badee raya
Parek deungon krueng kon keu teumpat broh
Pike rakan boh yoh goh binasa

Aron meuriti di bineh pante
Jinoe hana le sayang lagoina
Han soe le peutheun anoe pante
Sayang bukon le oh angen raya

Meunan cit rawa rab bineh pante
Bak bangka tan le jikoh dum rata
Eh noe meumada haba lon ca`e
Laot deungon gle haba lon rika

Bna, 18-06-05