Deungon bismillah haba lon peuphon
Lon keumeung suson bacut calitra
Izin ya Allah Neubri keu ulon
Haba lon himpon beu-ek seumpurna

Beu-ek meusampoe hajat di ulon
Keu bandum kawom mamfaat beuna
Meusoe nyang baca keunarang ulon
Neubri beumeuphom geuteupue makna

Wahe syedara sigala kawom
Kuta ngon duson bandum mulia
Inong ngon agam saleuem bak ulon
Keu bandum kawom tuha ngon muda

Bacut calitra lon cuba karang
Bah kureueng reumbang beuneutem baca
Sabab haba nyoe wahe dum rakan
Peureulee tapham geutanyoe dumna

Bacut lon kisah masaalah HAM
Nakeuh singkatan Hak Asasi Manusia
Jameun ka trep that thon peutploh lapan
Meupakat DUHAM dum Bangsa-Bangsa

Nibak masa nyan wahe e rakan
Baro piyoh prang donya kedua
Meuploh boh bangsa meupakat rijang
Nanggroe Apa syam di Amerika

Lhee ploh boh pasal di dalam DUHAM
Deklarasi Universal Hak Asasi Manusia
Bandum atra nyan geuyue teurapkan
Beurijang-rijang bak bandum bangsa

Dalam seujarah yoh jameun silam
Jameun musem prang ban sigom donya
Hak Asasi Manusia soe pakoe pih tan
Nyang leupah sayang rakyat jeulata

Hana soe boh yum nyawong lam badan
Sabab masa nyan ban hukom rimba
Soe-soe nyang teuga mat kekuasaan
Nyang mat wewenang cit ureung kaya

Seujarah meunan wahe e rakan
Lakee bak Tuhan bek le meugisa
Ta lakee do’a uroe ngon malam
Beu ek teudong HAM ban sigom donya

Sabab geutanyoe di mata Tuhan
Hak udep saban ateuh rueng donya
Saleng menjaga seusama insan
Kalheuh geupetrang dalam Agama

Hukom lam nanggroe geuyue teurapkan
Jeut na atoran hudep manusia
Bek sampe lagee cara binatang
Saleng mencakar saleng memangsa

Bek panyang leupah haba tamselan
Jinoe lon riwang ubak calitra
Nanggroe geutanyoe wahe dum rakan
Geuneuk teurap HAM kon pura-pura

Di ujong barat pulo Sumatra
Aceh mulia jinoe lon kheun ban
Di Propinsi Aceh Indonesia
HAM geuyue jaga laju le rijang

Peulisi ngon rakyat geuyue meurakan
Prang keujahatan bersama-sama
Kriminalitas peujareung rijang
Rakyat jeut teunang hudep bersama

Judi korupsi ngon peurampokan
Nyang meunan macam dak jeut bek le na
Barang nyang hareum ubat-ubatan
Ganja minuman peugadeoh sigra

Peutimang hukom jaga atoran
Bek sagai-sagai kri-kri nyang hawa
Adat bek tabeh hukom beutatueng
Reusam ngon qanun jaga bersama

Pue keuh di rumoh pue keuh bak jalan
Meunyo tan sopan tanyoe ceulaka
Pue keuh di kanto atawa pasai
Jaga ketertiban bersama-sama

Pue keuh di gampông atawa peukan
Lam pergaulan saleng menjaga
Bek reupah hak gob marit kreuh ceukang
Bek mita lawan anggap droe teuga

Ketertiban umum meunan cit macam
Lingkungan aman gangguan bek na
Aman lam gampông aman lam peukan
Aman bak jalan hayeu leupah na

Meumada oh noe bak ulontuan
Haba lon karang iluemee hana
Pat-pat nyang salah peumeu`ah rijang
Maklum hai rakan guree lon hana

Adak pih meunan ka lon ci karang
Deungon harapan mamfaat beuna
Mamfaat keu lon Neubri Ya Tuhan
Keu bandum rakan soe nyang tem baca

Haba ka habeh bak lon hai rakan
Bah keuh la`en jan meurumpok teuma
Beupanyang umu sehat pikeran
Beusehat badan watee pih beuna

Banda Aceh, 5 Agustus 2008

Keunarang: M.Y Bombang


Dimuat di Buletin Tuhoe Edisi XIV, Desember 2011