separator
Daweuet olon rho di ateuh kertah
Lon keuneuk peugah bacut carita
Carita lonpeugah bukon karangan
Tapi mandum nyan adalah nyata

Jalan u Patek mantong meutanoh
U Mukim Lamteungoh tujuan haba
Abee ngon leuhob dum bak jalan
Beuteugoh rakan kadang troh teuka

Gampông bineh gle jarak ngon peukan
Geuboh nan Teupin Asan sejak dile ka
Yoh gohlom konflik gampông that meugah

Hase meulimpah rakyat sejahtera
Panen boh kupi lagi ngon nilam
Dalam blang rakan pade meugunca
Thon 2003 konflik that parah
Syahid Abu Arafah di sinan punca

Ureueng di Paroh u Suak Beukah
Ladom na nyang leupah u lua kota
Rumoh geutinggai, lampoh dengan blang
Ternak hai rakan than le geukira

Sithon siteungoh lam pengungsian
Coba neubayang kiban sengsara
Oh watee leuh dame geuwo u gampông
Malang that untong than le sapeu na

Rumoh nyang indah lampoh nyang luah
Sayang that leumpah kajeut keu rimba
Jinoe ka tinggai di batas gampông
Supaya mudah kamoe lake tulong nibak syedara

Leuh ngon manusia jinoe ngon gajah
Abeh dicah tanaman yang ka na
Pakiban kamoe meubuka lampoh
Sedang keu pajoh jinoe than le na
Meunan keuh kisah Gampông Teupin Asan
Tulong hai rakan-rakan yang na kuasa

Cae: Ruslan Katana


Dimuat di Buletin Tuhoe Edisi XII, Mei 2010