Alhamdulillah pujo keu Allah Kalimah thaibah ke saiyidina
Jino lôn kisah saboh seujarah Seuramoe Makkah seupanjang masa

Kisah lôn rawi meuganto thôn Dari Millenium phôn lôntuan calitra
Hana that panyang kisah nyo ampôn Meu’ah awai phôn keu ulôn beuna

Thôn dua reubèe Millenium phôn Ureueng gampông jiplueng u gunong
Agam inong abéh mat seunjata Bak dua reubèe sa darurat teuka

Dua reubèe dua operasi meunasah Ureueng dayah abéh keunong pèh
Bak dua reubèe lhèe teuka JSCDungon HDCkaru siat wèh

‘Oh lheuh nyan karu lom teuma Agam ngon dara ka keunong paleut
Dua reubèe pheut tsunami teuka Bansigom donya mata pih teubleut

Dua reubèe limong janji perdamaian Dua reubèe nam karu jipiyôh
Dua reubèe tujôh meugantoe pimpinan Seusama rakan mantong na riyôh

Mantong na karu sabé keudroe-droe Pimpinan anggroe tuwoe keu jasa
Nyang keunong beudé nyang keunong gilhö Teutiek lam sagoe soe hiroe hana

Nyang gadöh aneuk nyang gadöh lako Keu bakông sugoe than meupat mita
BRR raya jimeu’ap keudroe Peulayeu moto kijang Inova

Akhé dua reubèe lapan BRR pinah Tugas geulimpah bak peumeurintah
Dua ribèe sikureung piléh lom waki Jiba lom janji angèn syiruga

Aceh tasayang goh teuntèe aman Meunyo meunan cara peunguasa
Awak luwa jiba pantauan Aceh nyo rakan karu lom teuma

Keudéh bak Allah talakèe do’a Aceh beujaya lagèe harapan
Do’a kamo beusama-sama Dari staf JKMAsampoe pimpinan

Keu bandum rakan lôn lakèe meu’ah Kadang na salah bak tutôran
Maklum lôntuan mantong sikula Aneuk miet that paja bak peundidikan

Dua reubèe tujôh jinoe ka abéh Seulamat waréh dua reubèe lapan teuka
Jinoe haba ulôn peu-abéh Meu’ah e cut téh ubiet ngon raya

Peurada, 11 Desember 2007

: Herman RN. Redaktur Pelaksana tuhoe.


Dimuat di Buletin Tuhoe Edisi IV, Desember 2007