Tuhoe XXI28 cover belakang ca'e

Salamualaikôm saleuem ulôn bri
Keu muda mudi tuha ngön muda
Keu ureueng Aceh taréh lôn bagi
Lôn ci rawi keu JKMA

Dengan Bismillah kisah lon mulai
Nama Ilahi Allah ta’ala
Alhamdulillah lôn pujoe Rabbi
Puja ngön puji syuko nekmat-Nya

Kruseumangat rahmat meuteuntèe
Nikmat meuribèe Allah karonya
Sikureueng-sikureueng lôn kheun thôn teuntèe
Di Ujông Batèe buka wacana

Bak Mukim Lamnga di Ujông Batèe
Dum sukè-sukè pasang keunira
Geumita taktik jeut-jeut watèe
Cara geuratèe geuluem kutika

Putôh pakat sambôt teurajèe
Simboi peuteuntèe nanjih JKMA
Thôn sikureueng-sikureueng lôn rampéng dilèe
Catat peureulèe gagaih peutama

Thôn dua ribèe lhèe lon buka rawi
Asrama Haji kongreh mulaan
Di sinankeuh phôn geurangkôm kaji
Munas mulai nibak masa nyan

Ngön tulông Tuhan Rabbul’izzati
Logo ka meukri siap ngon nan
JKMA Aceh masa nyan reusmi
Teungku Jailani jeut keu pimpenan

Thôn dua ribèe lhèe lon keubah rawi
Lôn sambông lagi Jailani Hasan
Thôn dua ribèe peut Aceh tsunami
Bapak Jailani ka trôh panggilan

JKMA Aceh ‘ohlheuh tsunami
Keuheundak Ilahi kosong pimpenan
Bapak Yuriun jeut keu PLTI
Deungon seundiri alih jabatan

Hana trép lheuh nyan geujak watèe
Keudéh di Blang Mee Mubes peunutôh
Piléh peungurôh peukuat teuntèe
Sinambông keulhèe dua ribèe tujôh

Aceh Tamiang rakan beutathèe
Lheuh kongreh keu lhèe Sabang jéhpat
Nan Karang Bundar Mukim hai gurè
Thon dua ribèe lhèe blah hasé meusambat

Paneuk calitra hai gurè-gurè
Lansông teurajèe u Banda siat
Dua ribèe tujôh blah ka geupeuteuntèe
Kongreh meuritèe keulimong mupat

Pak Hasyim Usman koordinator pang ulèe
Musyawarah peuteuntèe Asrama Haji teumpat
JKMA Aceh seu-ôn bak ulèe
Tanyoe meulakèe bak Allah Hujarat

‘Oh nokeuh rawi ulôn peusampèe
Meu’ah e gurè lôn peuriwayat
Maklôm lôntuan kureueng ileumèe
Haba meutirèe keu mangat-mangat

Tuhoe XXI28 maimun ahmad01-01-2018
Maimun Ahmad

Dimuat di Buletin Tuhoe Edisi XXI, Juni 2018